MANILA, Philippines - Kritikal ang kalagayan ng isang 25-anyos na binata matapos na aksidenteng mabaril ng ama nito na lango sa alak sa naganap na insidente sa Brgy. Balangasan, Pagadian City kamakalawa ng gabi.
Kinilala ang biktima na si James Russel Mendez, estudyante at residente ng nasabing lugar na patuloy na nilalapatan ng lunas sa Borbon Hospital sa tinamong tama ng bala ng cal.45 pistol sa kaniyang kanang dibdib na naglagos sa kaniyang likuran.
Nahaharap naman sa kasong kriminal ang ama nitong si Guillermo Mendez, 51, foreman na tumakas matapos ang insidente.
Bandang alas -11:52 ng gabi ng lasing na umuwi ang suspek na sinasaway ng anak nito sa pag-iingay ngunit ayaw paawat ay aksidenteng nakalabit ang gatilyo ng kaniyang armas na sumapul sa biktima.
Isinasailalim pa sa masusing imbestigasyon ng mga awtoridad ang nasabing insidente.