Kagawad dadalo sa Xmas party, binistay

MANILA, Philippines – Patay ang isang kagawad matapos pagbabarilin ng hindi pa nakilalang motorcycle riding-in-tandem habang patungo sa Christmas party sa Barangay Ramon Magsaysay, Sindangan, Zamboanga del Norte kamakalawa.

Kinilala ang nasawing biktima na si Roger Espina, 47 anyos, Barangay kagawad ng nasabing bayan, habang patuloy naman na iniimbestigahan ng pulisya ang pagkakailanlan ng mga suspek.

Sa report ng PNP Regional Office 9, dakong alas-7:20 ng gabi ng mangyari ang pamamaril kung saan sakay ng kanyang motorsiklo ang biktima na patungo sana sa Sevilleno Beach Resort para dumalo ng Christmas party ng sundan ng mga suspek at saka pinagbabaril.

Ang biktima ay nasapul ng mga tama ng bala sa katawan na duguang tumilapon sa sinasakyan nitong motorsiklo na sumemplang sa kalsada habang mabilis namang nagsitakas ang mga salarin.

Narekober naman ng pulisya sa crime scene ang mga basyo ng bala ng cal. 45 pistol.

Kasalukuyan nang isinasailalim sa masusing imbestigasyon ang kaso upang matukoy ang motibo ng krimen.