Binata utas, 2 sugatan sa pamamaril

MANILA, Philippines – Hindi na umabot ng buhay sa ospital ang isang 22-anyos na lalaki habang dalawa ang nasugatan nang sila ay pagbabarilin ng dalawang lalaki na sakay ng isang motorsiklo kamakalawa sa Quezon City.

Ang nasawi ay kinilalang si Jeffrey Padua, ng Abad Santos St., Brgy. Sta. Lucia sa lungsod. Habang ang mga sugatan ay sina Heidi Capili,16,  at Gilbert Ang, 37, residente rin lugar.

Tumakas naman ang dalawang lalaki na nakasuot ng helmet sakay ng isang motorsiklo.

Batay sa ulat, dakong alas-9:45 ng gabi ay nagkukwentuhan ang mga biktima sa kahabaan ng P. Burgos St., kanto ng J. Abad Santos St., Brgy. Sta. Lucia nang dumaan ang isang motorsiklo na may isang angkas sa likod.

Hindi kalayuan bago tuluyang lumiko ay huminto ang motorsiklo at nagbunot ng kanilang baril at sunod-sunod na pinaputukan ang mga biktima.

Patuloy ang imbestigasyon kung ano ang motibo ng pamamaril sa mga biktima.