MANILA, Philippines - Isang pinaniniwalaang “tulak” ng droga at number 5 sa listahan ng pulisya ang nadakip kamakalawa sa Muntinlupa City.
Nakilala ang suspek na si Raul Layug “alias Bisaya”, 45, nakatira sa #300 Purok1, Barangay Sucat ng naturang lunsod.
Lumalabas sa imbestigasyon ng pulisya, alas-2:00 ng madaling araw ng magsagawa ng anti-illegal drug operation ang pinagsanib na puwersa ng Station Anti-Illegal Drugs Special Operation Task Force (SAID-SOFT) at Intelligence Section ng Muntinlupa City Police sa naturang lugar base na rin sa mahigpit na kautusan ni Mayor Jaime Fresnedi na nagresulta sa pagkakadakip sa suspek na nakuhanan ng tatlong plastic sachet ng shabu.
Si Layug ay nakaditine ngayon sa Muntinlupa City Police detention cell at sinampahan na ito kahapon ng kasong paglabag Section 11, Article II of Republic Act 9165 (Dangerous Drugs Act of 2002) sa Muntinlupa City Prosecutor’s Office.