Pick-up sumalpok sa puno at pader... 4 tepok, 2 kritikal sa salpok

MANILA, Philippines – Hindi na umabot ng buhay sa ospital ang apat katao habang malubhang nasugatan ang dalawang iba pa matapos ang sinasakyan nilang pick-up ay sumalpok sa puno at pader kahapon ng madaling-araw sa highway ng Vinzons, Camarines Norte.

Ang mga nasawi ay kinilalang sina Jhed Rayven Malubay de Guzman, 12; Matthew Abiel Go de Leon,14; pawang mga apo ni Camarines Norte Provincial Board Member Teresita Malubay; Raisa Antoinette Azanza, 25, nurse; at Jack Dacuba.

Ang mga nasugatan naman ay sina Kevin Villamonte, 25, binata ng Happy  Homes Greenview Subdivision, Daet, driver ng Toyota Hi-Lux pick-up (UXI-886); at Rosalyn Tuazon, 25, nurse, residente ng lungsod ng Maynila.

Sa ulat ng Vinzons-PNP, dakong alas-12:15 ng madaling-araw ay binabagtas ng pick-up galing sa bayan ng Daet papuntang bayan ng Labo ang kahabaan ng Maharlika highway, pagsapit sa Sitio Lico, Barangay Sto. Domingo tapat ng Camarines Norte provincial motor pool ay nawalan umano ng kontrol si Villamonte sa manibela dahil sa basa ang kalye dulot ng malakas na ulan kaya’t humampas ito sa isang malaking puno at bumangga sa pader ng motor pool.

Isinugod ang mga biktima sa pagamutan, subalit nasawi ang apat.

Patuloy naman ang isinasagawang imbestigasyon ng mga otoridad.