Mister tinodas katabi si misis
MANILA, Philippines – Malapitang binaril sa ulo ng isang holdaper ang isang mister habang katabi ang misis kahapon ng madaling-araw sa Divisoria Market, Tondo, Maynila.
Ang biktima na namatay noon din ay kinilalang si Primo Ansale, 60, dating seaman, residente ng Block 18, Lot 4, Hernandez St., Catmon, Malabon City.
Ang suspek na tumakas ay inilarawan na nasa pagitan ng 30 hanggang 40 anyos, balingkinitan, nakasuot ng maong na shortpants at sando na kulay puti.
Batay sa ulat, bago nangyari ang krimen dakong alas-2:00 ng madaling araw sa kanto ng Planas at Lakandula Sts., Divisoria Market ay napansin na ng misis ng biktima na si Teresita sa paglabas nila sa isang fast food chain ay nakatingin na sa kanila ang suspek na sumusunod sa kanilang paglalakad.
Nang makalapit ay nagbukas ng payong ang suspek at nagdeklara ng holdap sa biktima, subalit tumanggi na ibigay ang pitaka kung kaya’t binaril ito sa ulo.
Sa pagtakas ng suspek ay tangay ang pitaka na may lamang P5,000 cash at dalawang cell phone ng mag-asawa.
- Latest
