MANILA, Philippines - Hindi na umabot ng buhay sa pagamutan ang biktimang si Daniel Angeles, 31, may-asawa, conductor ng Five Star Bus Corporation nang saksakin ng isa sa dalawang snatcher na nagpapanggap na barker matapos tulungan nito ang isang pasaherong babae na hinablutan ng mga suspek ng kuwintas kamakalawa sa Pasay City.
Ang dalawang suspek na nakatakas ay kinilala sa police photo gallery na sina Louie Lim, 34, binata at Benjie Tengco, nasa hustong gulang, kapwa nakatira sa #152 Apelo Cruz St. Malibay, Pasay City.
Sa ulat, alas-2:15 ng hapon sa harap ng isang convenience store sa kahabaan ng EDSA Avenue ng lungsod ay nakasakay ang biktima sa isang Five Star Bus na may rutang Pangasinan matapos manggaling sa kanilang terminal sa Aurora Boulevard, Quezon City.
Habang binabagtas nila ang kahabaan ng EDSA Avenue, Pasay City ay pinara sila ng isang pasaherong babae na hindi na binanggit ang pangalan at kaagad naman bumaba ang biktima upang tulungang buhatin ang mga bagahe nito.
Subalit, nang paakyat na ng bus ang babae ay biglang lumapit ang mga suspek at sabay na hinablot ang suot na gintong kuwintas.
Nakita ito ng biktima kung kaya’t ibinato nito sa isa sa suspek ang bagaheng hawak na tinamaan at bumagsak sa kalsada.
Ang isang suspek naman ay binunot ang patalim mula sa kanyang bewang at sinaksak ang biktima.
Duguang bumulagta ang biktima at mabilis naman tumakas ang mga suspek bitbit ang ginamit na patalim at ang hinablot na kuwintas na pag-aari ng pasaherong babae.