MANILA, Philippines - Sa patuloy umanong clan war o rido ng mga pamilya sa bayan ng Sultan, Borongis, Maguindanao ay nasawi ang isang Commander ng Moro Islamic Liberation Front (MILF) at anak nitong barangay. chairman matapos na paulanan ng bala ng mga armadong kalalakihan.
Ang mga nasawi ay kinilalang sina Datu Mohamad alyas Commander Batuh ng MILF 106th Base Command at anak nitong si Sadam Mohamad, Chairman ngBrgy. Tongal.
Pinaniniwalaan namang ang nasa likod ng pamamaril ay ang grupo ni Kagi Sajid alyas Commander Saya, isa ring Commander ng MILF National Guard ng 104th Base Command.
Sa ulat ni Maguindanao Provincial Police Office (PPO) Director P/Sr. Supt. Rodelio Joson, natukoy ang mga suspek base sa pahayag ng mga testigo sa krimen.
Sa ulat, naganap ang insidente sa Brgy. Tongal nitong Miyerkules ng bandang alas-12:00 ng tanghali habang pauwi na ang mag-ama sa kanilang bahay nang paulanan ng bala ng mga kalabang mortal mula sa angkan ni Saya.
Nagtamo ng mga tama ng bala mula sa malalakas na kalibre ng baril na agad nilang ikinasawi.
Sa panig naman ni Col. Dickson Hermoso, Spokesman ng Army’s 6th Infantry Division na nagpadala na ng peacekeeping team ang militar upang mamagitan at mapigilan ang karahasan sa pagitan ng magkalabang angkan.