MANILA, Philippines - Tinadtad ng bala ng isang mister na nag-AWOL (Absence Without Official Leave ) sa Philippine Navy ang kalaguyo ng kaniyang misis sa Brgy. Kasanyangan, Zamboanga City kamakalawa ng gabi.
Namatay noon din ang biktimang si Jhonrey Altamia, 32, binata na nagtamo ng maraming tama ng bala ng cal. 45 pistol sa ulo at iba pang bahagi ng katawan.
Ang suspek na tumakas ay kinilalang si Raymond delos Reyes, nasa hustong gulang, idineklarang nasa AWOL status sa Philippine Navy.
Batay sa ulat, bago nangyari ang krimen dakong alas-9:30 ng gabi sa kahabaan ng Talon-Talon road dumpsite, Brgy. Kasanyangan sa lungsod ay kasalukuyang pauwi ang biktima lulan ng kaniyang Mazda B2200WT(PND 523) matapos dumalo sa kaarawan ng anak na lalaki ng nobya na misis ng suspek.
Pagdating sa nasabing lugar ay hinarang ng suspek na sakay ng motorsiklo ang kotse ng biktima at walang kaabog-abog na pinagbabaril ito saka mabilis na tumakas.
Lumalabas sa imbestigasyon na nilayasan ng misis at mga anak ang suspek matapos silang magkaroon ng tampuhan hanggang sa ito ay makipagrelasyon sa biktima.
Nang malaman ng suspek na nagkaroon ng relasyon ang misis sa biktima ay nagkaroon ito ng matinding poot hanggang sa planuhin ang paghihiganti na humantong sa pamamaslang sa biktima.