MANILA, Philippines - Nagsampa ng reklamo ang isang 34-anyos na lalaki laban sa tatlong pulis na nang-hulidap sa kanya kahapon ng umaga sa Malate, Maynila.
Sa salaysay ng biktimang si Jayson Villarin, 34, ng San Miguel, Maynila, dakong alas-5:30 ng umaga habang sakay siya ng bisekleta at binabaybay ang Lopez St., nang sitahin siya ng mga suspek na ang isa ay kinilala niyang si PO3 Abenoja, na nakalagay sa name plate sa uniporme, isa ang nakasibilyan at isang may ranggong SPO1 na natatakpan ng suot na jacket ang name plate.
Pinababa siya at pinalo ng posas sa ulo, binugbog at pilit na ipinalalabas umano ang iniskor niyang shabu.
Dahil wala naman talaga siyang dalang shabu ay kinuha ng mga ito ang kaniyang cell phone at P200 cash.
Bago siya iwan ay hinubaran ng sapatos at damit na nawala umano sa lugar at inilayo sa kaniyang tabi ang bisekleta upang hindi na makahabol.