Road rage: 2 pulis nagbarilan
MANILA, Philippines - Dahil umano sa away trapiko ay nagbarilan ang dalawang pulis sa bahagi ng Herbosa St., Tondo, Maynila, kahapon ng madaling-araw.
Ang dalawang pulis ay kinilalang sina PO1 Liderato Cruz, 32-anyos, may-asawa, nakatalaga sa Southern Police District (SPD) at residente ng no. 115 Hernandez St., Tondo, Maynila at PO3 Dennis Santiago, 43-anyos, nakatalaga sa District Public Safety Battalion sa headquarters ng Manila Police District (MPD).
Hindi pa malinaw sa pulisya ang tunay na motibo nang pagbabarilan ng dalawang pulis at sinasabi lang ng mga ito na nagkagitgitan sila sa kalye dakong alas-2:10 ng madaling-araw sa panulukan ng Herbosa at Juan Luna Sts., Tondo habang lulan ng kanilang motorsiklo.
Ang dalawang pulis ay dinala sa Mary Johnston Hospital na kung saan si Cruz ay nagtamo ng multiple gunshot wounds habang isang tama lamang ng bala sa kanang hita ang natamo ni Santiago.
Iniimbestigahan din kung bakit 9mm na kalibre ang baril na ginamit ni Cruz at hindi ang kaniyang service firearm.
- Latest
