MANILA, Philippines - Nakaranas ng matinding paghihirap bago pinatay ang isang babae at isang lalaki na ang mga bangkay ay natagpuan sa creek ng isang palayan sa General Trias, Cavite, kamakalawa ng gabi.
Sa salaysay sa pulisya ng isang Joselito Ambata, dakong alas-6:00 ng gabi habang nagpapakain siya ng alagang mga baka nang makaamoy ng mabaho sa lugar.
Hinanap niya ang pinanggalingan ng baho at dito ay nakita ang dalawang bangkay sa creek sa isang palayan sa Brgy. Buenavista 1 na agad nitong inireport sa pulisya.
Inilarawan ng pulisya ang bangkay ng lalaki na nasa 35-45 ang edad, may taas na 5’9”, nakasuot ng pulang t-shirt at maroon khaki short habang ang babae naman ay nasa edad 30-40, nasa 5’5” ang taas, nakasuot ng puting stripe blouse at navy blue na leggings.
Ang dalawa ay kapwa may busal ang mga bibig at nababalutan ng packaging tape ang mukha bago tinakluban ng t-shirt. Nakagapos din ng tape ang mga kamay at paa ng mga ito habang kapwa may mga sugat at pasa sa katawan at may marka ng sakal sa leeg at bukod pa rito ay kinakitaan pa ng tatlong pako sa ulo ang lalaking biktima.
Patuloy pa ang imbestigasyon ng pulisya upang makilala ang dalawang biktima na pinaniniwalaan na pinatay sa ibang lugar at doon lang itinapon upang mailigaw ang imbestigasyon.