MANILA, Philippines - PINAGHAHANAP ngayon ang dalawang trabahador ng isang 70-anyos na biyuda makaraang pagnakawan ang bahay nito, kamakalawa ng hapon sa Caloocan City.
Kinilala ni Lola Isabelita Mendoza, ng Road 1 Gen. T. De Leon, Caloocan City, ang mga suspects na sina Daniel Dela Cruz, at Agosto Crisidio, kapwa nasa hustong gulang, mga stay-in na construction worker sa bahay ng biktima.
Umalis umano ng bahay ang biktima at ang driver nito dakong alas-2 ng hapon at nagsimba. Nang makabalik, hindi na nila mahagilap ang dalawang trabahador at natuklasan na puwersahan na pinasok ang kuwarto ni Mendoza.
Nabatid na nawawala sa kuwarto ng biktima ang US$1,500; P1,000 cash at mga alahas na aabot sa halagang P117,000.
Nang puntahan ang kuwarto ng mga suspects, wala na rin ang mga damit ng mga ito tanda na tuluyang tumakas matapos na makapagnakaw.