MANILA, Philippines - Ang labis na depresyon umano ang dahilan nang pagbibigti ng isang 61-anyos na si Pedro Uriarte preso sa loob ng selda nito sa Lanuza, Surigao del Sur kamakalawa.
Nadiskubre ang pagpapakamatay ni Uriarte bandang alas-2:30 ng madaling araw sa nasabing piitan na matatagpuan sa Poblacion ng nasabing bayan.
Huling nakitang buhay ang biktima na kausap ang duty jail guard na si PO1 Ronielo Ruina at PO2 Jiff Felix matapos na mapansin ang sobrang kalungkutan nito.
Habang nagsasagawa nang pag-iinspeksyon sa selda si PO3 Ronald Cabis ay laking gulat nito nang makitang nakabigti na ang biktima gamit ang nylon na nakatali sa kulambo na kaniyang ginagamit sa selda.