MANILA, Philippines - Naging madugo ang isang masayang kasalan nang mabaril at mapatay ng isang pulis ang kaibigan nitong barangay tanod sa wedding reception kamakalawa sa Brgy. Pasonanca, Zamboanga City.
Namatay noon din ang biktimang si Herman delos Reyes, nakatalaga sa palengke ng lungsod dahil sa tinamong tama ng bala sa katawan mula sa cal.9 MM caliber pistol.
Ang suspek na kinasuhan ng homicide ay nakilalang si PO2 Richard Aguilar Bumanglad, nakatalaga sa City Hall Community Assistance Center (COMPAC) ng Zamboanga City Police.
Sa ulat ng pulisya, bago naganap ang krimen bandang alas-2:40 ng hapon sa wedding reception sa likuran ng Zamboanga City Water District, Motorpool ay dumalo ang suspek at biktima na kapwa magkaibigan.
Habang kumakain ang mga ito sa reception area ng kasalan ay aksidenteng nakalabit ng naturang pulis ang gatilyo at ang bala ay tumama sa katawan ng nasabing biktima na duguang bumulagta at binawian ng buhay noon din sa insidente.