MANILA, Philippines - Isang guro sa pampublikong paaralan ang dinukot ng tinatayang walo hanggang sampung armadong kalalakihan kamakalawa sa Sitio Paraitan, Brgy. Limaong, Zamboanga City.
Ang biktma ay kinilalang si Cathy May Casipog, 23, guro sa Sibogtok Elementary School sa Limaong Island.
Batay sa ulat, bandang alas-3:00 ng hapon ay kasama ng biktima ang mga kapwa guro na sina Michel FalcaÂsantos, 28 at Mencie Vegilia, 24 sa pump boat ng isang Akram Lauki, 19 pauwi sa kanilang bahay.
Pagsapit sa Sitio Paraitan ay hinarang sila ng mga armadong suspek at tinutukan ng baril ang biktima at kinaladkad pasakay sa isa sa dalawang pumpboat na tumahak sa direksyon ng Eleven Islands.
Ang mga kidnapper ay lulan ng dalawang pumpboat na may tatak na Sangali na may pinturang puti at dilaw.
Patuloy ang masusing imbestigasyon ng mga otoridad upang mabatid kung anong grupo ang responsable sa pagbihag sa biktima.
Naglunsad na ng hot pursuit operations ang pinagsanib na elemento ng pulisya at militar sa Brgy. Limaong , ÂTumitus at Taguiti ; pawang ng Zamboanga City para sagipin ang biktima at arestuhin ang mga kidnapper.
Pinaghihinalaan na mga bandidong Abu Sayyaf Group na kilalang notoryus sa kidnapping for ransom sa Western Mindanao, subalit maliban sa mga ito ay may iba pang grupo ng mga kidnapper na nag-o-operate sa lugar.