MANILA, Philippines - Namatay habang nilalapatan ng lunas sa San Juan De Dios Hospital ang isang kawani ng Philippine Amusement and Gaming Corporation (PAGCOR) nang barilin sa ulo ng mga hindi pa nakikilalang suspek kamakalawa ng gabi sa Pasay City.
Ang biktima ay kinilalang si Johannes De Asis, 43, CCTV technician ng PAGCOR sa Manila Pavillion Hotel sa UN Avenue, Maynila at residente ng no. 1316 Mataas na Lupa Street, Malate, Maynila.
Sa ulat, dakong alas-6:30 kamakalawa ng gabi ay sakay ang biktima ng kanyang puting Honda Civic (UFD-826) at pagdating sa kanto ng Seaside Blvd., at J.W. Diokno Blvd., ng naturang lungsod ay nilapitan ito ng mga suspek at malapitang binaril sa ulo.
Sa salaysay ng security guard na si Jumen Gerale ng DJA Security Agency, kumakain siya sa kanilang barracks nang makarinig ng putok na inakala niyang sumabog na gulong.
Nang inspeksyunin ang pinagmulan ay nakita niya ang duguang at naghihingalo pang biktima na nakalugmok sa loob ng naturang kotse kaya’t humingi siya ng saklolo sa mga kasamahan para madala ang biktima sa pagamutan.
Tinitingnan ng pulisya kung may kinalaman sa kanyang trabaho sa casino ang pamamaslang.