MANILA, Philippines - Lasog ang katawan ng isang lasing na lalaki matapos maipit ng kasalubong na mixer truck nang tumilapon mula sa minamanehong motorsiklo na ikinasugat din ng apat katao naganap kamakalawa sa bayan ng Manukan, Zamboanga del Norte.
Ang nasawing biktima ay kinilalang si Jose Rey Bularon, 39, may-asawa, ng Brgy. Calokso, Roxas ng lalawigang ito.
Isinugod naman sa pagamutan ang mga nasugatang sina Noe Limbaga, 34, kaangkas ng nasawi; John Johnbert Cadalin, 38; misis nitong si Cherryl Ananza at Prence Ann Nocito, 7.
Sa imbestigasyon, dakong alas-4:40 ng hapon ay minamaneho ni Bularon ang kanyang motorsiklo kaangkas si Limbaga sa kahabaan ng national highway ng Brgy. Villaramas, Manukan nang aksidente itong bumangga sa hulihang bahagi ng motorsiklo na minamaneho ni Cadalin.
Sa lakas na pagkakabangga ay tumilapon si Bularon sa motorsiklo at naipit ng kasalubong na mixer truck na minamaneho naman ni Danilo Gamok, 41.