MANILA, Philippines - Isang negosyante at dalawa nitong kasama na engineer at police escort ang dinukot ng mga armadong kalalakihan sa bayan ng Linamon, Lanao del Norte.
Ang mga biktima ay kinilalang sina Robert Kua, may-ari ng Findlay Millar Timber Company, Engineer Edwin de la Torre at police escort na di tinukoy ang pangalan.
Sa ulat, bandang alas-4:30 ng hapon noong Miyerkules nang maganap ang pagdukot sa mga biktima sa highway ng Brgy. Samburon, Linamon, Lanao del Norte.
Nai-report lang ang pagkidnap kamakalawa nang magtungo sa himpilan ng pulisya ang driver ni Kua na si Candido Mausisa na pinawalan umano ng mga kidnapper.
Sa salaysay ni Mausisa na minamaneho niya ang kulay asul na Land Cruiser at lulan ang mga biktima at patungong Cagayan de Oro City nang harangin ng mga suspek pagsapit sa lugar.
Agad na tinutukan ng baril ng mga kidnapper ang mga biktima at kinomander ang behikulo kung saan pinababa ng mga ito sa masukal na bahagi ng highway sa lugar ang driver na si Mausisa na siyang nag-report ng insidente sa mga otoridad.
Isinailalim sa pagtatanong ng mga otoridad si Mausisa dahil sa late na nito ini-report ang insidente.
Nagsasagawa ng seÂarch and rescue operations ang mga otoridad upang ligtas na mabawi ang mga bihag.