Ginang naabo sa sunog

MANILA, Philippines - Halos hindi na makilala ang bangkay ng isang ginang matapos makasama sa sunog ang kanyang bahay sa mga kabahayan sa Quezon City kamakalawa ng gabi.

Ang biktima ay nakilalang si Elizabeth David, 45, na nadiskubre mula sa kanyang bahay sa Barangay Tandang Sora kasunod ang sunog na tumama sa may 10 kabahayan.

Ayon kay QC Deputy Fire Marshal Supt. Samuel Tadeo ay nakita pa umano ang ginang na bumalik sa kanilang bahay sa may panulukan ng Venus Street at Tandang Sora Avenue sa kasagsagan ng sunog na nagsimula dakong alas-11:40 ng gabi sa bahay ng isang  nangangalang David sa lugar.

Narekober ang katawan ng biktima sa ikalawang palapag ng kanyang bahay.

Tinatayang may 15 pamilya ang nawalan ng tirahan sa sunog.