MANILA, Philippines -Namatay ang dalawang katao matapos sumabog ang isang granada na nabitiwan ng isang lasing na lalaki sa harapan ng tindahan na pag-aari ng isa sa biktima sa bayan ng Hilongos, Leyte.
Ang mga nasawi ay kinilalang sina Corazon Vega, 63, store owner at Teofilo Fabio Jr., pawang residente ng Brgy. Talisay, Hilongos ng lalawigang ito.
Sa ulat, pasado alas-5:00 ng hapon nang maganap ang insidente sa nasabing lugar may dalawang araw na ang nakalilipas.
Nabatid na nakainom si Fabio nang aksidenteng mabitawan ang dalang granada na agad na sumabog na siyang naging mitsa ng kanilang kamatayan.
Narekober sa explosion site ang isang Magnum .357 paltik revolver na may lamang anim na bala, mga fragments ng sumabog na granada, drug paraphernalia at plastic sachet na naglalaman ng 20 gramo ng shabu na bitbit ni Fabio.