MANILA, Philippines -Pinagsasaksak ng isang lalaki ang kainumang magsasaka matapos na sitahin ang alagang baboy na sumira sa taniman ng mais nito kamakalawa sa Brgy.Lalab, Dimataling, Zamboanga del Sur.
Nasawi noon din dahil sa mga saksak sa iba’t ibang bahagi ng katawan ang biktimang si Renerio Tubuon, 48-anyos.
Naaresto ang suspek na si Junefer Cortez, 27 residente ng naturang lugar.
Batay sa ulat, dakong alas-10:00 ng umaga ay magkakasamang nag-iinuman ang biktima, suspek at iba pang kalalakihan sa Purok 1, Brgy. Lalab, Dimataling.
Nang kapwa malasing ay sinita ng biktima ang suspek tungkol sa alaga nitong baboy na sumira sa mga bagong tanim na mais ng una na nauwi sa mainitang pagtatalo.
Sa gitna ng mainitang pagtatalo ay inundayan ng sunud sunod na saksak ng suspek ang biktima na siya nitong ikinamatay.