US diver na nakahanap sa bangkay ni Robredo dedo sa sekyu

MANILA, Philippines - Sabog ang mukha ng isang American “technical diver” na nakahanap sa bangkay ng yumaong dating Department Interior and Local Government (DILG) Sec. Jesse Robredo nang barilin ng security guard ng tinutuluyang subdibisyon, kamakalawa ng gabi sa Las Piñas City.

Namatay noon din ang  biktima na kinilalang si Matthew Caldwell, 59-anyos, isa sa direktor ng Allegro Company at nanunuluyan sa Block 20, Lot 45-46 Hamilton Heights Subd., Brgy. Talon V, ng lungsod.

Ang suspek na pinaghahanap ng pulisya ay kinila­lang si Ericson Blacquio, tauhan ng South Star Security Agency at naninirahan sa Sampaloc Site, BF Homes, Parañaque City.

Bago naganap ang pamamaril dakong alas-10:30 ng gabi sa main gate ng subdibisyon ay sakay  ang biktima ng kanyang Toyota Corolla sedan (TTS-316) kasama ang live-in partner na si Jeanalyn Flora, 36, at papasok sana sa subdibisyon nang harangin ng suspek na si Blacquio at pagbawalan na makapasok dahil sa kautusan umano ng Homeowners Association dahil sa matagal nang hindi nakakabayad ng “monthly dues” nito.

Nagkaroon ng pagtatalo ang dalawa hanggang sa puwersahang tinanggal ng Amerikano ang nakaharang na kahoy sa gate hanggang sa mainis ang suspek at binaril sa mukha.