Sekyu ng DOLE inutas ng NPA

MANILA, Philippines - Isang security guard na nagsisilbing escort ng DOLE Philippines ang nasawi matapos na pagbabarilin ng hindi pa nakilalang mga armadong kalalakihan na pinaghihinalaang miyembro ng mga rebeldeng New People’s Army (NPA) naganap kamakalawa sa Brgy. Amag, Bayabas, Surigao del Sur.

Ang nasawi dahil sa dalawang tama ng bala sa dibdib ay kinilalang si Albert Sabalo, 44, security guard ng Mega VPS Security Agency na nakatalaga sa Stanfilco, DOLE na nakabase sa Tago, Surigao del Sur at miyembro ng Quick Reaction Team ng nasabing kumpanya.

Batay sa ulat, bandang ala-1:30 ng hapon nang matagpuan ng dalawang kasamahang guwardiya  ang bangkay ng biktima na may tama ng bala sa katawan at nakabulagta sa daan.

Sa imbestigasyon ng pulisya nag-escort ang biktima kasama ang dalawa pang guwardiya sa container van ng DOLE Philippines bilang ‘advance security’ sa convoy sa lugar na dadaanan ng naturang kontrabando nang makitang nakabulagta ito.