MANILA, Philippines - Pinagbabaril sa loob ng kanyang opisina ang isang babaeng head guidance counselor ng isang eskweÂlahan ng dalawang lalake naganap kahapon ng umaga sa Rodriguez, Rizal.
Idineklarang dead on arrival sa Montalban Infirmary Hospital dahil sa limang tama ng bala ang biktima na kinilalang si Adorable Mas, 48, may-asawa, head guidance counselor ng Pamantasan ng Montalban at residente ng Rodriguez, Rizal.
Hindi pa kilala ang daÂlawang lalake na mabilis na tumakas sakay ng isang itim na HD Kawasaki motorcycle na walang plaka.
Sa salaysay ng security guard ng pamantasan na si Antonio Ferno, dakong alas-10:15 ng umaga nang dumating ang mga suspek sakay ng motorsiklo at pumasok sa loob ng campus na matatagpuan sa KasigÂlahan Village, Barangay San Jose sa Rodriguez at tumuloy sa tanggapan ng biktima.
Ilang sandali ay nakaÂrinig ng limang putok ng baril at nakitang mabilis na lumabas ang mga suspek na pareÂhong may bitbit na maikling kalibre ng baril.
Hindi naman umano nagawa ng guwardiya na pigilan ang mga suspek matapos siyang tutukan ng baril.
Inaalam ngayon ng mga otoridad kung may kinalaman sa trabaho ng biktima ang motibo ng pamamaslang sa kanya.