Pamilya Singson hinamon na magpa-drug test

MANILA, Philippines - Upang patunayan na hindi gumagamit ng  iligal na droga at karapat-dapat muling mamuno sa lalawi­gan ng Ilocos Sur kung  kaya’t hinamon ng Team Kalayaan sa pangunguna ni Tagudin Mayor Jun Verzosa ang pamilya Singson at iba pang politiko sa lalawigan na boluntaryong magpa- drug test.

Ang mga lokal na kandidato ng Liberal Party at iba pang po­litiko na sumalang sa drug test sa Jose Reyes Memorial Medical Center at negatibo ang resulta.

Sa pulong balitaan, sinabi ni Verzosa, kumakandidato bilang gobernador sa Ilocos Sur, na dapat buma­ngon ang lalawigan mula sa madungis na imahe nito ma­karaang mahuli noon si Cong. Ronald Singson sa pagdadala ng droga noong 2011 sa Hong Kong.

Inihayag ni Verzosa, da­ting head security ni incumbent Governor Chavit Singson na nakapokus sila sa fiscal reform kasabay ng pag­kwestyon sa kasalukuyang administrasyon sa lalawigan kung saan napunta ang kaban ng bayan kabilang na ang P6.2 bilyong pisong excise tax nito buhat sa parte sa Tobacco Levy fund.

Ayon pa dito, sa loob ng 42 taong panunungkulan ng mga Singson, nananatiling “third class province” ang Ilocos Sur kahit na bilyon-bilyon ang nakukuha sa buwis sa tabako.

Kasama ni Verzosa na sumalang sa drug test na pawang negatibo ang resulta sina Efren Rafanan, Vice Gubernatorial candidate at Atty. Trandy Baterina na kumakandidato bilang kongresista sa District 1 kasama ang iba pa nilang kapartido.