MANILA, Philippines - Isang 19-anyos na dalagang estudyante ang hinalay at pinagsasaksak ng 21 na beses kamakalawa sa Brgy.Lawaan, Roxas City.
Himalang nakaligtas ang biktima ng Barangay Quinayuya, Dao, Capiz, na kasalukuyang nagpapagaling sa ospital.
Batay sa ulat ng pulisya, ang biktima ay sumakay sa colorum na tricycle papauwi sa kanyang bahay sa Fuentes Drive na kung saan ay may lalaking nakaangkas sa likod.
Dito ay nagdeklara holdap ang mga suspek at kinuha ang gamit ng biktima at pagkatapos ay kinaladkad sa liblib na lugar saka ginahasa bago pinagsasaksak.
Sa pag-aakalang patay na ang biktima ay tumakas ang mga suspek na sa kalaunan ay natagpuan ang biktima ng isa pang tricycle driver na siyang nagdala sa ospital.
Nagsagawa ng follow-up operation ang mga otoridad at nadakip ang angkas ng tricycle na nakilalang si Jessie dela Cruz, 30, ng Punta Tabuk, Roxas City habang patuloy na pinaghahanap ang driver.