MANILA, Philippines - Isang miyembro ng Cafgu ang pinagbabaril at napatay sa inilatag na checkpoint ng mga rebeldeng New People’s Army (NPA) kamakalawa ng hapon sa Brgy. Lydia, San Luis, Agusan del Sur.
Kinilala ni Army’s 4th Infantry Division (ID) Spokesman Lt. Col. Eugenio Julio Osias IV, ang nasawing biktima na si CAFGU Active Auxiliary (CAA) Luis Dejado, 19-anyos ng Brgy. Binacalan, San Luis ng lalawigang ito.
Batay sa ulat, dakong alas-10:00 ng umaga nang magsagawa ng checkpoint ang may sampung armadong rebeldeng NPA sa nasabing lugar at sa pagdaan ng behikulo ng biktima ay binistay ito ng bala.
“What the NPA did was a clear violation of our 18-days cease-fire agreement”, pahayag naman ni Col. Ronald Albano, Commander ng Army’s 402nd Infantry Brigade.
Magugunita na ang gobyerno ay nagdeklara ng ceasefire noong Disyembre 16 ng taong ito na tatagal hanggang Enero 2 ng susunod na taon.