MANILA, Philippines - Utas ang isang 3 anyos na batang lalaki matapos na tamaan ng ligaw na bala nang paputukan ang kanyang lolo na sugatan sa pamamaril ng mga hindi pa nakikilalang suspek kamakalawa ng gabi sa Port Area, Maynila.
Nabatid na dakong alas-7:00 ng umaga nang matuklasan ng pamilya ni Sidfred Bering ng Block 1 Aplaya, Baseco Compound, Port Area ang kanyang sinapit mula sa pamamaril ng nakatakas na suspek.
Sa imbestigasyon ni PO3 Rodel Benitez ng MPD homicide, alas-9:30 ng gabi noong Sabado naganap ang pamamaril ng suspek sa lolo ng bata na si Dominador Besco, 46.
Natutulog ang maglolo nang biglang dumating ang suspek at pagbabarilin si Besco.
Bagaman sugatan, nagawang makatakbo at makapagtago ni Besco na sinabayan na rin ng pagtakas ng suspek.
Agad na dinala ng kanyang kaanak sa Orthopedic Hospital si Besco habang naiwan naman sa bahay ang paslit.
Kahapon ng umaga nadiskubreng bangkay na si Bering nang hindi na ito humihinga at napansing puno ng dugo ang unan ng biktima na nagtamo ng isang tama ng bala sa noo.