Mass burial ayaw ng DOH

MANILA, Philippines - Ayaw ng pamunuan ng Department of  Health (DOH) sa mass burial sa mga naging biktima ng hagupit ng bagyong ‘Pablo’.

Sinabi ni Dr. Lyndon Lee-Suy, chief ng Emerging and Re-emerging Diseases,  sa oras na mamatay ang isang tao ay hindi naman na lilipat ang mga mikrobyo nito sa katawan ng mga buhay.

Ayon kay Lee-Suy, hindi pa maituturing na isang banta sa kalusugan sakaling hindi agad mailibing ang mga bangkay na biktima ng mga flashflood sa Compostela Valley at Davao Oriental dulot ng bagyong Pablo.

Aniya, mas mabuting mabigyan ng maayos na libing ang mga biktima pero kung iyon umano ang opsyon ng mga local government ay wala naman silang magagawa.

Una ng napaulat na binigyan na umano ng taning ng National Disaster Risk Reduction and Management Council (NDRRMC) ang kaanak ng mga biktima ng flashflood sa Compostela Valley at Davao Oriental para kilalanin ang mga bangkay dahil magsasagawa na sila ng mass grave.