MANILA, Philippines - Isang bagitong pulis na sakay ng motorsiklo ang nasawi matapos na masalpok ng sasakyan ng isang kabaro kamakalawa ng gabi sa kahabaan ng highway ng KM 2, Baan, Butuan City, Agusan del Norte.
Nasawi habang nilalapatan ng lunas sa Butuan City Medical Center matapos na magtamo ng malubhang sugat sa kaniyang ulo ang biktimang si PO1 Rommel Casilagan, 27.
Kinasuhan naman ng reckless imprudence resulting to homicide ang nakabangga rito na si SPO1 Dennis Serrano.
Base sa imbestigasyon, kasalukuyang minamaneho ng biktima ang kaniyang Honda XRM motorcycle (KJ -9332 ) nang mabangga ito ng KIA Carnival (KED 441 ) na minamaneho ni Serrano sa bisinidad ng nasabing lugar.
Hindi umano napansin ni Serrano ang motorsiklo ni Casilagan matapos na kumaliwa kaya’t nagbanggaan.
Sa lakas ng pagkakabangga ay tumilapon sa motorsiklo si Casilagan na humampas pa ang ulo sa espaltadong kalsada.