MANILA, Philippines - Nagsilikas ang may 17 pamilya o nasa 95 na mga katutubong Lumad matapos pagbantaan ng mga nagpakilalang miyembro ng mga rebeldeng New People’s Army (NPA) na gumagala sa kanilang komunidad sa Brgy. Malabog, Davao City.
Sa report na nakarating sa Army’s 10th Infantry Division (ID), ang grupo ni Commander Leoncio Pitao na aktibong nag-ooperate sa Davao Region ang nasa likod ng insidente.
Sa sumbong ng mga katutubong Lumad sa tropa ng militar, pinagbabantaan umano sila ng NPA rebels na lisanin ang lugar dahilan doon magdaraos ng kanilang ika-44 anibersaryo sa darating na Disyembre.
Ayon kay Datu Tresio Lumuyok, pinuno ng naturang tribo bunga ng matinding takot sa gumagalang grupo ni Pitao na nagbabanta sa mga ito ay napilitan ang mga pamilyang Lumad na magsilikas sa kanilang mga tahanan.
Ang mga nagsilikas na residenteng Lumad ay mula sa Purok 26, Sitio Alon, Brgy. Malabog ay nagsipagtago sa Marilog District ng lungsod.