MANILA, Philippines - Nasakote ng pinagsanib na elemento ng pulisya at militar ang dalawang lalaki na pinaghihinalaang miyembro ng kidnap for ransom gang (KFRG) at sangkot din sa Lapuyan massacre sa Zamboanga del Sur kamakalawa ng hapon sa Pagadian City.
Kinilala ni Army’s 1st Infantry Division (ID) Spokesman Major Alberto Caber ang mga nasakoteng suspek na sina Montasser Mangoda Ratarta alyas Totongan at Rachmodin Vel Andi alyas Den.
Ang mga suspek ay pawang sangkot sa kidnapping for ramsom ng mga mayayamang negosyante sa Zamboanga Peninsula, pamamaslang sa anim katao sa naganap na massacre sa Brgy. Lapuyan ng nasabing lalawigan noong nakalipas na Pebrero na nasakote ng pinagsanib na puwersa ng Army’s 53rd Infantry Battalion at ng Pagadian City Police nitong Huwebes bandang alas-4:00 ng hapon.
Ang dalawang suspek ay mga tauhan ng notoryus na lider ng KFR gang ng mag-amang Amie Andi at anak nitong si Amer.