MANILA, Philippines - Patay ang isang rider ng motorsiklo habang walo ang nasugatan makaraang suyurin ng isang 16 wheeler truck na nawalan ng preno ang 11 sasakyan na bumabagtas sa C5 Road sakop ng Makati City kahapon.
Dead-on-the-spot ang biktima dahil sa pagdurog ng ulo nito kahit na naka-crash helmet na si James Pan Cuaderno, nasa hustong gulang habang isinugod sa Ospital ng Makati ang walo pang biktima na karamihan ay mga bata.
Nadakip naman ang driver ng trak na nakilalang si Normalito Rombua na ikinatwiran na nawalan umano ng preno ang kanyang minamanehong sasakyan.
Sa inisyal na ulat ng Metropolitan Manila Development Authority naganap ang insidente pasado alas-4:00 ng hapon sa northbound lane ng C5 Road Brgy. East Rembo, Makati sa tapat ng Market! Market Mall.
Bigla umanong nawalan ng kontrol ang naturang trak kaya napilitan si Rombua na ibangga ito sa pader ng fly-over ngunit natumbok pa rin ang grupo ng mga nakamotorsiklo at iba pang sasakyan kabilang ang ilang sports utility vehicle.