Curry-less Warriors wagi sa Jazz
SAN FRANCISCO — Kumamada si Dennis Schroder ng 23 points at may 20 markers si Brandin Podziemski sa 114-103 paggupo ng Stephen Curry-less Golden State Warriors sa Utah Jazz.
Tumipa rin si Podziemski ng pitong rebounds at anim na assists para saluhin ang trabaho ng two-time MVP na si Curry.
Nag-ambag si Andrew Wiggins ng 19 points para sa Warriors (23-23) na ipinahinga si Curry dahil sa kanyang sumasakit na mga tuhod.
Binanderahan ni Collin Sexton ang Jazz (10-35) sa kanyang season high 30 points habang may tig-13 markers sina Drew Eubanks at Micah Potter.
Bago ang halftime ay umiskor muna si Podziemski ng limang sunod na puntos para sa 62-51 kalamangan ng Golden State patungo sa paghuhulog sa Utah sa pang-pitong dikit na kamalasan.
Sa Philadelphia, nagpaputok si Tyrese Maxey ng 43 points kasama ang apat na three-point shots para pangunahan ang 76ers (18-27) sa 118-104 paggupo sa Los Angeles Lakers (26-19).
Sa Atlanta, nagposte si Fil-Am Jalen Green ng 25 points para tulungan ang Houston Rockets (32-14) sa 100-96 pagpapasabog sa Hawks (22-25).
Sa Portland, bumira si Deni Avdija ng season-high 30 points para pangunahan ang Trail Blazers (18-29) sa 125-112 pagdaig sa Milwaukee Bucks (26-19).
- Latest
