Alcoseba, Remolino nadepensahan ang korona sa age group triathlon
MANILA, Philippines — Muling kuminang sina Raven Faith Alcoseba at Andrew Kim Remolino matapos madepensahan ang kanilang mga titulo sa men’s at women’s divisions sa 2025 National Age Group Triathlon (NAGT) Series opening leg noong Linggo sa Subic Boardwalk, Zambales.
Sinikwat ni Alcoseba, ang 2023 Cambodia Southeast Asian Games aquathlon bronze medalist, ang kanyang ikaapat na korona sa oras na 1:09.55 laban kina Erika Nicole Burgos ng Tanauan, Batangas (1:06:33) at Kira Ellis ng Laguna (1:06:16).
“Super tough po ang competition lalo na galing sa training camp ang lahat ng mga kasali. Lima kaming magkakasabay at nag-catch up lang po ako sa bike and then sa run,” pahayag ng 22-anyos na tubong Talisay City na si Alcoseba.
Nagtala naman ang 23-anyos na si Remolino, isang second year Marketing Management student sa University of San Jose Recoletos-Cebu City, ng personal best na 56:44 para sa ikalawang sunod niyang men’s elite championship.
Inungusan ang sariling oras na 56:56 nang maghari rin noong isang taon, kinaldag ni Remolino ang kapwa Cebuano na si Matthew Justine Hermosa na nagrehistro ng tiyempong 56:46.
“We want to maintain our best time po kasi this is the start of the season. Marami pa po puwedeng mangyari at hindi pa po talaga sigurado kung sino ang makakapag-represent sa amin sa December Thailand SEA Games,” wika ni Remolino.
Nakopo ni Jose Ramos ang ikatlong puwesto sa Elite Men sa 57:22.
- Latest
