Eumir Marcial bumuwelta

MANILA, Philippines — Rumesbak si Eumir Marcial para pabula­anan ang mga paratang na pambababae at pananakit ng asawa nitong si Princess.

Lumabas kahapon sa isang press conference si Marcial sa Zamboanga City para itanggi ang mga inihayag ni Princess sa kanyang post sa social media kamakalawa.

Base sa post ni Princess, nahuli nitong nambababae si Marcial ngunit nagdesisyon itong patawarin ito sa kabila ng pagtututol ng ilang malalapit nitong kamag-anak at kaibigan.

Subalit sinabi ni Princess na hindi pa rin naputol ang umano’y ugnayan nina Marcial at ng babae nito dahilan para magsampa na ito ng reklamo sa korte.

“I caught Eumir having an affair in October last year. I, along with my sister, have personally caught them inside an Airbnb condominium in Pasay where we had them both arrested at a police station. Eumir and his mistress both had to be temporarily detained for 5 days,” ani Princess sa kanyang post.

Gayunpaman, itinanggi ito ni Marcial partikular na ang pananakit umano nito.

“Hindi totoo lahat ng sinabi niya sa akin. Kung sinasaktan ko siya, hindi lang na ganun lang mangyayari sa kanya, may pasa siya sa paa. Pinoprotektahan ko lang ang sarili ko sa kanya,” ani Marcial.

Nilinaw din ni Marcial na wala ring katotohanan na winidraw nito ang lahat ng pera sa kanilang bank account para patayuan ng bahay ang umano’y kabit nito.

Nasaktan din si Marcial sa ginawa ni Princess dahil kumalat pa ito sa media sa halip na pag-usapan na lamang dahil ito ay personal na buhay nilang mag-asawa.