Debut ni Romeo sa Dyip purnada sa Hotshots

MANILA, Philippines — Pinurnada ng Magnolia ang inaabangang debut ni Terrence Romeo para sa Terrafirma matapos ang dikit na 89-84 tagumpay sa 2024-2025 PBA Commissioner’s Cup kahapon sa Ni­noy Aquino Stadium sa Maynila.

Kumawala ang Hotshots sa fourth quarter upang ipagpag ang makulit na Dyip at makaangat sa 3-5 kartada papalapit sa krusyal na dulo ng 13-team elimination rounds.

Kumulimbat ng 32 points, 14 rebounds at 3 assists si import Ricardo Ratliffe upang trangkuhan ang balikwas ng Hotshots na naglustay ng 22-point lead sa huling laban nila sa ‘Christmas Clasico’ kontra sa Barangay Ginebra.

Nakasikwat ng alalay si Ratliffe mula kina Zavier Lucero, Ian Sangalang at rookie na si Jerom Lasti­mosa na tumabo ng 17, 13 at 11 points, ayon sa pag­kakasunod.

May 8 points, 2 rebounds at 2 steals din na am­bag si Aris Dionisio para mapunan ang opensa ng Hotshots matapos magkasya lang sa 4 at 2 points sina Mark Barroca at Calvin Abueva, ayon sa pagkakasunod, habang may iniinda pang meniscus injury si Paul Lee.

Dahil sa lagpas dalawang linggong pagkaka­tengga, kinalawang ang Magnolia at bigong ma­tam­bakan agad ang wala pang panalong Terrafirma na taliwas sa inaasahan.

Hindi nakapagtayo ng double digits ang Magnolia na siyang pinakamalaki nang bentahe ang 82-75 matapos ang 7-0 ratsada.

Iyon lang ang kinaila­ngang kawala ng Hotshots mula sa 75-75 tabla upang maiskor ang dikit na ta­gumpay.

Natameme lang sa 14 puntos at 8 rebounds ang import na si Brandon Walton-Edwards habang bumida sa local crew sina Stanley Pringle at Kevin Ferrer na may 14 at 11 puntos, ayon sa pagkakasunod, para sa Terrafirma na sumasadsad sa 0-9.

Limang puntos ang ambag ni Romeo na ka­sa­ma ni Vic Manuel sa trade.