MANILA, Philippines — Huhugot ng puwersa ang defending champions National University kay reigning tournament MVP Alyssa Solomon sa pagharap nila sa Far Eastern University sa knockout semifinals ng 2024 Shakey’s Super League collegiate pre-season championship sa Rizal Memorial Coliseum.
Makikipagtulungan si Solomon kina veterans Bella Belen, Vange Alinsug, Erin Pangilinan at Lams Lamina para akbayan ang Lady Bulldogs at harapin ang mga pambato ng Lady Tamaraws.
Magsisimula ang paluan ng dalawang powerhouse squads ngayong alas-6 ng gabi pagkatapos ng classification match sa pagitan ng Ateneo Lady Eagles at University of the East Lady Warriors sa alas-3:30 ng hapon.
Walang ibang nasa isip ang NU kundi ang suwagin ang pangatlong sunod na kampeonato.
“Ang mindset namin is kailangan maayos pa namin ‘yung mga kulang,” ani Lady Bulldogs assistant coach Karl Dimaculangan.