MANILA, Philippines — Isa sa mga superstars ngayong henerasyon si De La Salle University standout at UAAP Most Valuable Player awardee Kevin Quiambao.
Matunug na matunog si Quiambao na solido ang inilalaro para sa Green Archers na magtatangkang depensahan ang kanilang korona sa UAAP Season 87 men’s basketball tournament.
Mataas ang IQ ni Quiambao sa paglalaro dahilan para makuha nito ang atensiyon ni Gilas Pilipinas head coach Tim Cone.
Makailang ulit nang sumalang si Quiambao kasama ang Gilas Pilipinas.
Malaking karangalan para sa 6-foot-5 player na mapabilang sa national team kasama ang mahuhusay na pro players sa bansa.
“As a player, this is a big achievement in my career knowing that it’s the Philippine flag that’s draped on the jersey I’m wearing,” ani Quiambao sa programang Power and Play.
Naging bahagi si Quiambao ng Gilas noong 2022 FIBA Asia Cup, FIBA Basketball World Cup 2023 Asian Qualifiers, FIBA Asia Cup 2025 Qualifiers at FIBA Olympic Qualifying Tournament.
“Playing for the Philippines and representing the country is a once in a lifetime opportunity that I don’t want to miss. And for me, once my name is called, I’ll just give my best,” ani Quiambao.
Nakapaglaro pa ito kasama si dating NBA superstar Dwight Howard sa Strong Group Athletics na sumabak sa Dubai International Basketball Championships sa United Arab Emirates.
Kaya naman ang mga natutunan nito sa Gilas Pilipinas ang dinadala nito sa UAAP.