MANILA, Philippines — Kumolekta si Joshua Guiab ng 19 points at 12 rebounds para tulungan ang Jose Rizal University sa 75-63 paggupo sa Emilio Aguinaldo College sa NCAA Season 100 men’s basketball tournament kahapon sa FilOil EcoOil Centre sa San Juan City.
Diniskaril ng Heavy Bombers ang hangad na back-to-back wins ng Generals para sa kanilang 3-5 marka kapareho ng huli.
Nagdagdag si rookie Robin Bernardo ng 13 markers, habang may 12 points si Shawn Argente para sa Jose Rizal na kinuha ang 36-32 halftime lead.
Itinabla ni Nico Quinal ang EAC sa 45-45 sa huling 2:25 minuto ng third period.
Sa likod nina Guiab at MJ Raymundo ay nakahulagpos ang Heavy Bombers sa 69-57 sa 1:48 minuto ng fourth quarter.
Binanderahan ni King Gurtiza ang Generals sa kanyang 15 points.
Sa unang laro, tinakasan ng Arellano University ang College of St. Benilde, 73-71, tampok ang 16 markers ni T-Mac Ongotan.
Nag-ambag si Ernjay Geronimo ng 14 points para sa 3-6 kartada ng Chiefs.
Laglag ang Blazers sa 6-2 para masosyohan ng Mapua Cardinals (6-2) sa liderato kasunod ang Letran Knights (5-3) at San Beda Red Lions (4-3).