MANILA, Philippines — Dinomina ng Far Eastern University ang San Sebastian College-Recoletos, 25-14, 25-19, 25-20, sa Pool D ng 2024 Shakey’s Super League Collegiate Pre-season Championship kahapon sa Rizal Memorial Coliseum.
Nakipagtuwang si rookie Clarisse Loresco kina veterans Alyzza Devosora at Kyle Pendon para sa 1-0 record ng Lady Tamaraws.
Tumapos ang middle blocker na si Loresco na may siyam na puntos, ang apat ay ginawa niya sa third set kasama ang isang quick attack na dumiskaril sa pagbangon ng Lady Stags.
“Masaya po ako na maganda ang inilaro ko and thankful kay coach Tina (Salak) for giving me the opportunity na maipakita ko yung laro ko in today’s game,” wika ng 18-anyos na si Loresco.
Nagdagdag sina Devosora at Pendon ng tig-pitong marka at may anim na puntos si Nikka Medina.
Kontrolado ng FEU, ang National Invitationals runners-up, ang first at second sets mula sa kanilang solidong net defense at mga attacks.