MANILA, Philippines — Bumangon ang nagdedepensang San Beda University mula sa naunang kabiguan matapos gibain ag Jose Rizal University, 77-60, sa NCAA Season 100 men’s basketball tournament kahapon sa FilOil EcoOil Centre sa San Juan City.
Humakot si big man Yukien Andrada ng 16 points, 10 rebounds at 3 assists para sa 3-2 record ng Red Lions.
Laglag naman ang Heavy Bombers sa 1-4.
Dumikit ang Jose Rizal sa first period kasunod ang pagtatala ng San Beda ng 24-point lead, 46-22, sa halftime.
Mula rito ay hindi na nakabalik ang Heavy Bombers.
Sa unang laro, kumolekta si rookie guard Mark Gojo Cruz ng 18 points, 6 assists, 5 rebounds, 3 blocks at 2 steals sa 73-67 panalo ng University of Perpetual Help System DALTA sa Emilio Aguinaldo College.
Tinapos ng Altas ang dalawang dikit na kamalasan para sa 3-2 kartada at ibinagsak ang Generals sa 2-3 marka.
“Sinabi ko lang sa kanila to play for 40 minutes,” wika ni Perpetual coach Olsen Racela.