MANILA, Philippines — Sinilat ng bisitang EST Cola ang Farm Fresh, 22-25, 25-17, 19-25, 25-20, 17-15, para sa kanilang unang panalo sa 2024 Premier Volleyball League (PVL) Invitational Conference kahapon sa Mall of Asia Arena sa Pasay City.
Pinaganda ng mga Thais ang kanilang baraha sa 1-3 at inilubog ang Foxies sa 0-3 sa five-team, nine-day tournament.
Ang top two teams matapos ang elimination round ang mag-aagawan para sa kampeonato.
Nagpaputok si Warisara Seetaloed ng 33 points mula sa 29 attacks, dalawang service ace at dalawang blocks para banderahan ang EST Cola na binubuo ng under-18 at under-20 national teams ng Thailand.
Umiskor si Natthawan Phatthaison ng 18 markers at may 10 points si Nattharika Wasan.
Binanderahan ni Japanese import Asaka Tamaru ang Farm Fresh sa kanyang 20 points mula sa 18 attacks, isang ace at isang block.
Nagdagdag si Cykle Tagsip ng 18 markers, habang may 14 at 12 points sina Caitlin Viray at Trisha Tubu, ayon sa pagkakasunod.
Nauna nang natalo ang Thailand team sa nagdedepensang Kurashiki Ablaze, Creamline Cool Smashers at Cignal HD Spikers bago ginulat ang Foxies.
Babangon ang Farm Fresh mula sa tatlong dikit na kamalasan sa pagharap sa Creamline bukas.