Win No. 2 inilista ng Blackwater
MANILA, Philippines — Idiniretso ng Blackwater sa dalawa ang kanilang pananalasa matapos talunin ang Phoenix, 123-111, sa PBA Season 49 Governors’ Cup kahapon sa Smart Araneta Coliseum.
Muling binanderahan ni import George King ang pagtatala ng Bossing ng 2-3 record sa kanyang 44 points habang tumipa si No. 2 overall pick Sedrick Barefield ng conference-high 32 markers, 5 assists at 3 rebounds.
“We knew that their import is gonna come in and give them some light, give them some motivation the same way that George did for us,” ani coach Jeffrey Cariaso.
Nagpasabog si Brandon Francis, pumalit kay Jay McKinnis, ng 45 points at may 29 markers si Jason Perkin para sa Fuel Masters na bagsak sa 0-5 marka.
Mula sa 64-58 halftime lead ay umarangkada ang Blackwater sa third period para kunin ang 81-66 mula sa magkasunod na three-point shot at four-point shot ni King sa 8:55 minuto nito.
Nakalapit ang Phoenix sa 82-88 matapos maghulog ng isang 16-6 bomba patungo sa 104-109 agwat sa likod ni Francis sa 5:35 minuto ng fourth quarter.
Nakumpleto ni Barefield ang isang 3-point play kasunod ang jumper at isang freethrow para sa 115-104 abante ng Blackwater sa huling 3:06 minuto.
Puntirya naman ng Meralco ang ikatlong dikit na pagragasa sa pagharap sa Converge ngayong alas-5 ng hapon kasunod ang laro ng Magnolia at NorthPort sa alas-7:30 ng gabi sa Big Dome.
- Latest
