MANILA, Philippines — Bigong makahirit ng medalya si para wheelchair racer Jerrold Mangliwan matapos pumangwalo sa men’s 400-meter T52 race sa 17th Paris Paralympic Games na ginaganap sa Stade de France sa Paris.
Nagrehistro si Mangliwan ng isang minuto at .04.55 segundo nunit hindi ito sapat para makapasok sa podium sa Paralympics.
Naghari si reigning Belgian world champion Maxime Carabine na may matikas na 55.10 segundo na naitala habang pumangalawa naman si Tokyo Olympic gold medalist Sato Tomoki na may 56.26 segundo.
Nasa ikatlo ang isa pang Japanese bet na si Ito Tomoya na may 1:01.08.
Nakatakda namang sumalang sina taekwondo jin Alain Ganapin at swimmer Ernie Gawilan sa kani-kanyang events kahapon.
Makakalaban ni Ganapin sa first round si Hadi Hassanzada ng Refugee Paralympic Team sa men’s K44 -80-kilogram sa Grand Palais.
Sa kabilang banda, hataw naman ang Asian Para Games gold medalist na si Gawilan sa men’s 200m individual medley SM7 heats sa Paris La Defense Arena.
Maliban sa naturang event, masisilayan din sa aksyon si Gawilan sa 400m freestyle S7 heats sa Setyembre 2.
Nauna nang nasibak sa kontensiyon si para archer Agustina Bantiloc na natalo kay Brazilian Jane Karla Gogel, 143-127, (25-29, 28-29, 24-29, 27-29, 23-27) sa opening knockout round ng women’s individual compound event sa Les Invalides shooting range.