MANILA, Philippines — Naging espesyal ang 108-102 panalo ng Barangay Ginebra kontra sa San Miguel sa PBA Season 49 Governors’ Cup noong Martes sa Smart Araneta Coliseum.
Nagpaputok kasi si resident import Justin Brownlee ng bagong PBA career-high na 51 points para makasampa ang Gin Kings sa win column sa Group B at inilaglag ang Beermen sa 2-1.
Ginawa ito ni Brownlee sa harap ng kanyang twin sister na si Justina na binisita siya sa bansa sa kauna-unahang pagkakataon.
“For the first time, I got a younger sister that came,” ani Brownlee. “My mom, my brother came from my immediate family, but this is my first time — I swear.”
Noong Lunes ng umaga dumating sa bansa si Justina para personal na mapanood sa aksyon ang three-time Best Import awardee.
“I didn’t know she was coming! She surprised me,” gulat na wika ni Brownlee sa kanyang kambal. “But it’s always great to see her.”
Humakot din si Brownlee ng 13 rebounds para sa unang panalo ng Ginebra sa torneo.
“She definitely gave me some motivation and inspiration to come out and play harder,” wika ng Gilas Pilipinas naturalized player. “She’s always been my biggest fan ever since we were kids.”
Inaasahang muling manonood si Justina ng laro ni Brownlee sa pagsagupa ng Gin Kings sa Blackwater Bossing sa Biyernes sa Ninoy Aquino Stadium.