Pinoy para athletes sasabak na sa Paris

MANILA, Philippines — Handang handa na ang Team Philippines na sumalang sa 2024 Paris Paralympics kung saan aarangkada ang anim na atleta na target masikwat ang unang gintong medalya ng Pilipinas sa quadrennial meet.

Mangunguna sa kampanya ng pambansang dele­gasyon si Agustina Bantiloc na masisilayan sa aksyon sa para archery women’s individual compound.

Sasalang si Bantiloc sa alas-7 ng gabi (oras sa Maynila) kung saan makakalaban nito ang 27 iba pang atleta sa qualifying round na idaraos sa Les Invalides Arena.

Target ni Bantiloc na makapasok sa medal round na idaraos sa Setyembre 1.

Kasalukuyang nasa ika-24 puwesto si Bantiloc sa word ranking ng para archery women’s individual compound.

Kaya naman may tsansa itong makahirit ng medalya sa kabila ng presensiya ng malalakas na kalahok mula sa iba’t ibang panig ng mundo.

Galing si Bantiloc sa bronze medal finish sa Compound Open Mixed Category Para Archer Olympic Qualifiers na ginanap sa Thailand noong nakaraang taon.

Hahataw naman si Allain Ganapin sa taekwondo competition sa Agosto 31 sa Grand Palais.

Unang makakalaban ni Ganapin si Hadi Hassanzada ng Refugee Paralympic Team sa men’s K44 -80kg round of 32 match na gaganapin sa alas-4 ng hapon.

“We pray that the success of our Olympians in Paris just two weeks ago will rub off and inspire our athletes to excel more than ever before,” ani Philippine Paralympic Committee president Mike Barredo.

Kasama rin sa delegasyon si Asian champion Ernie Gawilan ng swimming gayundin sina Cendy Asusano (women’s javelin throw F54), Jerrold Mang­liwan (men’s wheelchair race T52) at Angel Otom (women’s swimming S5).