MANILA, Philippines — Papalagan ng Basheirrou ang mga tigasing nagsaad ng paglahok sa 2024 PHILRACOM “4-Year-Old Sprint Race” na ilalarga sa Agosto 25 sa Metro Turf, Malvar - Tanauan City, Batangas.
Rerendahan ni former Philippine Sportswriters Association, (PSA) - Jockey of the Year awardee Jonathan Basco Hernandez ang Basheirrou upang harapin ang apat pang mahuhusay na kabayo sa distansyang 1,000 meter race.
May nakalaan na P300,000 guaranteed prize na ikakalat sa unang apat na kabayong tatawid sa meta, ang ibang naghayag ng pagsali ay ang 2024 Commissioner’s Cup I champion, Istulen Ola, Gusto Mucho, Secretary at Sky Story.
Base sa komento ng mga karerista, posibleng magbigay ng magandang laban sa Basheirrou ang Istulen Ola at Sky Story na mga gagabayan nina reigning PSA-JoY awardee John Alvin Guce at Pabs Cabalejo, ayon sa pagkakasunod.
Hahamigin ng mananalong kabayo ang P180,000, mapupunta sa second placer ang P67,500 habang P37,500 at P15,000 ang third at fourth.
Paniguradong bakbakan agad ang limang matutulin na kabayo sa largahan upang makapuwesto ng maganda sa unahan.