Marcial nagtamo ng injury 2 weeks bago ang Paris Games

MANILA, Philippines — Inamin ni Eumir Marcial na tinamaan ito ng injury dalawang linggo bago umarangkada ang 2024 Paris Olympics sa France.

Ikinuwento ni Marcial ang pinagdaanan nito bago magsimula ang Paris Olympics.

Walang ibinigay na eksaktong detalye si Marcial ngunit inamin nito na na-injure ito sa kasagsagan ng kanyang paghahanda para sa Paris Games.

Malaki ang naging epekto nito sa Pinoy champion partikular na sa laban nito kay Turabek Khabibullaev ng Uzbekistan kung saan lumasap ito ng unanimous decision loss sa men’s 80kg division.

Tuluyang namaalam sa kontensiyon si Marcial na bigong mapantayan ang kanyang bronze-finish sa Tokyo Games.

“Not many people know but behind the scenes, I sustained an injury two weeks leading up to this match that prevented me to move and do my usual training, which also affected my mental strength and overall performance,” ani Marcial.

Sa kabila ng kabiguan, walang pagsisisi si Marcial.

“But no regrets still, I know God has a bigger purpose for this loss. I may not understand it now but I need to trust that it was God’s protection to keep me safe from any further potential injury,” dagdag ni Marcial.

Isa si Marcial sa mga inaasahang mag-uuwi ng medalya para sa Team Philippines.

Subalit nagulantang ang lahat nang umani ito ng kabiguan sa kanyang unang pagsalang sa Paris Games.

“It’s a difficult place to be in, no one really prepares to lose. But like I said there’s no excuses. The people know that it has always been my absolute dream to win the gold medal at the Olympics not just for myself, for my family, but most especially, for the Philippines,” ani Marcial.

Nagpasalamat si Marcial sa lahat ng sumuporta sa kanyang laban.